ភ្នំពេញ៖ អ្នកចាត់ការទូទៅក្រុមជម្រើសជាតិកម្ពុជា លោក Keisuke HONDA បានដឹកនាំក្រុមជម្រើសជាតិក្រោមអាយុ២៣ឆ្នាំហ្វឹកហាត់ ដើម្បីត្រៀមការប្រកួតថ្នាក់តំបន់អាស៊ាន AFF នៅថ្ងៃច័ន្ទ ទី១៤ ខែកុម្ភៈ ដើមសប្តាហ៍ក្រោយនេះ។

នៅក្នុងការហ្វឹកហាត់នាកីឡដ្ឋានរបស់ក្លឹបភ្នំពេញក្រោនគឺមានវត្តមានកីឡាករសរុបចំនួន ៣៥រូប ខណៈនឹងត្រូវជម្រុះយកត្រឹម ២៨នាក់ ដំណាក់កាលទី២ ដើម្បីចូលរួមការប្រកួតពានរង្វាន់ AFF U23 Championship 2022។

បើតាមឱ្យដឹងពីគ្រូជំនួយរបស់ក្រុមជម្រើសជាតិលោក ភា សុភ័ក្ដ្រា បានឱ្យដឹងថា ក្រុមជម្រើសជាតិបានសម្រេចពន្យារពេលក្នុងការប្រកាសជម្រុះយកកីឡាករ ២៨នាក់ចុងក្រោយ ដើម្បីឱ្យពួកគេមានឱកាសហ្វឹកហាត់ និងដកស្រង់បទពិសោធន៍ផ្ទាល់ជាមួយលោក Keisuke HONDA។

គួរបញ្ជាក់ផងដែរថា ការប្រកួតពានរង្វាន់ AFF U23 Championship 2022 នេះនឹងចាប់ផ្ដើមការប្រកួតពីថ្ងៃទី១៤-២៦ ខែកុម្ភៈ ឆ្នាំ២០២២ នៅពហុកីឡដ្ឋានជាតិមរតកតេជោ និងកីឡដ្ឋានព្រីនស៍ ដោយមាន ៣ ពូល ដោយពូលA មានម្ចាស់ផ្ទះកម្ពុជា ទីម័រខាងកើត ហ្វីលីពីន និងព្រុយណេ ពូលB មានឥណ្ឌូនេស៊ី ម៉ាឡេស៊ី មីយ៉ាន់ម៉ា និងឡាវ ពូលC មានថៃ វៀតណាម និងសិង្ហបុរី។

សម្រាប់សំបុត្រចូលទស្សនាត្រូវបានដាក់លក់ហើយនៅទីតាំងចំនួន ៥ រួមមានពហុកីឡាដ្ឋានជាតិអូឡាំពិក ហាងកីឡា Fan Sport ហាងកីឡា HH Sport កីឡាដ្ឋានរបស់ក្លឹបបឹងកេត និង Motor Café ទួលគោក៕